സ്വാമിയെ അറിയില്ലെ? ആള് കേമനാ.. ഇപ്പോള്‍ ഒരുകൊലപാതക കേസിലെ പ്രതി. കേസിലെ വിസ്താരം നടക്കുന്നതിനാല്‍ എന്നും പ്രതിക്കൂട്ടിലുണ്ട്. ആദ്യനാളുകളില്‍ ഒത്തിരി വയ്യായ്മ മുഖത്തുണ്ടായിരുന്നു. പിന്നെ..പിന്നെ പ്രസരിപ്പായി. ഒട്ടിയ കവിളുകള്‍ വിടര്‍ന്നിരിക്കുന്നു. പാറിയ തലമുടി ഒതുക്കി ചീവിയിട്ടുണ്ട്. താടിക്ക് ചെറിയ വളര്‍ച്ചകൂടി വന്നതോടെ കാണാന്‍ സുന്ദരനായി.
താന്‍ സുന്ദരനാണെന്ന അഹങ്കാരം മുഖത്തില്ല. കൊലപാതകിയാണെന്നും വായിച്ചെടുക്കാനാവില്ല. വെറുകെ നേരം പോക്കിന് ചെയ്ത കൊലപാതകമെന്ന മട്ടിലാണ് നില്‍പ്പ്..അല്ല, ഇരിപ്പ്. പ്രതിക്കൂട്ടില്‍ കോടതി സമ്മാനിച്ച സ്റ്റൂളിലാണ് ആശാന്റെ ഇരിപ്പ്. അനുസരണയുള്ള 'നിരപരാധി'യെപ്പോലെ കോടതിക്ക് അഭിമുഖമായിട്ടായിരുന്നു ആദ്യദിവസങ്ങളില്‍ ഇരുന്നത്. അക്കാലത്ത് സ്വാമിയെന്ന 'ഹീറോ'യെക്കാണാന്‍ എത്തിയിരുന്നത് കുറച്ചുപേരൊന്നുമല്ല. ആണായും പെണ്ണായും വക്കീല്‍ കോട്ടണിഞ്ഞവരായിരുന്നു അധികവും.
നിയമം പഠിക്കാന്‍ ഇറങ്ങിയവരും ഇടക്ക് സ്വാമിയെ കാണാനെത്തും. അവര്‍ക്ക് മൂന്നുണ്ട് കാര്യം സ്വാമിയെയും കാണാം നിയമോം പഠിക്കാം വാദോം കേള്‍ക്കാം. കാണാന്‍ കൊള്ളാവുന്നവരും അല്ലാത്തവരുമായി ആളുകൂടിയപ്പോള്‍ സ്വാമി ഇരിപ്പിന്റെ ദിശയൊന്നുമാറ്റി. കോടതിപോലും അറിയാതെയുള്ള സ്ഥാനമാറ്റം 'ചോരകുടിക്കാനായി' ഉപയോഗിക്കാന്‍ തുടങ്ങി. തെക്കോട്ടഭിമുഖമായ കോടതിയില്‍ പടിഞ്ഞാറോട്ട് തിരിഞ്ഞായി കേമന്റെ ഇരിപ്പ്. ഗ്യാലറിയില്‍ വന്നിരിക്കുന്നവരെ കണ്ട് അളവെടുക്കുന്ന സ്വാമിയെ കണ്ടാല്‍ കരണത്തുനിന്ന് കയ്യെടുക്കാന്‍ തോന്നില്ലെന്നത് വസ്തുത.
No comments:
Post a Comment