കൂട്ടില്‍ 'സുന്ദരക്കുട്ടപ്പനായ' പ്രതി

'ലുങ്കുമുണ്ടും ബട്ടനുകള്‍ പൊട്ടിയ മുഷിഞ്ഞ ഷര്‍ട്ടും' അതാണ് ഇത്രനാള്‍ ഇയാളെ കുറിച്ച് മനസ്സില്‍പതിഞ്ഞ വേഷം. കൃത്യം നടത്തുമ്പോള്‍ ഇര വലിച്ചുപൊട്ടിച്ചതാണ് ബട്ടനുകള്‍. നെഞ്ചില്‍ കണ്ട നഖപ്പാടുകള്‍ ഇരയുടേതാണെന്നും ഇരയുടെ നഖത്തിന്റെ ഇടയില്‍ നിന്ന് കണ്ടെത്തിയ തൊലി പ്രതിയുടേതാണെന്നും തെളിഞ്ഞിട്ടുണ്ട്.
കൃത്യം കഴിഞ്ഞ് റോഡിലേക്ക് ഇറങ്ങുമ്പോള്‍ മുതല്‍ പ്രതിയെ കണ്ടവരെല്ലാം ഷര്‍ട്ടിലെ കേടുപാടുകളും മുണ്ടും തിരിച്ചറിഞ്ഞു. ഒരുമാസത്തിലേറെയായി തിരിച്ചറിയലും മൊഴിപറച്ചലും നടക്കുമ്പോള്‍ പ്രതി കൂട്ടില്‍ നിന്നതെല്ലാം ലുങ്കിമുണ്ടും ഷര്‍ട്ടും ധരിച്ചാണ്. വളര്‍ന്നുവന്നുകൊണ്ടിരിക്കുന്ന കുറ്റിത്താടി. കോല്‍മുടി. മുഷിഞ്ഞതും ബട്ടന്‍പൊട്ടിയതല്ലെങ്കിലും ഭേദപ്പെട്ട വേഷം. ജയില്‍ അധികൃതര്‍ അക്കാര്യത്തില്‍ ശ്രദ്ധിച്ചിരുന്നെന്ന് സാരം.
എന്നാല്‍ ഇക്കഴിഞ്ഞ ശനിയാഴ്ച(16.07.2011) പ്രതി കൂട്ടിലെത്തിയപ്പോള്‍ കണ്ടവര്‍ മൂക്കത്തുവിരല്‍വച്ചു. ഈ കേസില്‍ ഇത്രയുംനാള്‍ കൂട്ടില്‍ കണ്ടിരുന്ന പ്രതിയല്ല.

താടിയെല്ലാം ഷേവ് ചെയ്തു. അതിലിത്ര കാര്യമില്ല. എന്നാല്‍, പ്രതിയുടെ വേഷം...ചന്ദന കളര്‍ പാന്റ്, വെള്ളയില്‍ പ്രിന്റുചെയ്ത വരകളോടുകൂടിയ വിദേശ തുണിയുടെ ഷര്‍ട്ട്.. ഹോ..കാണേണ്ട കാഴ്ച. സുന്ദരക്കുട്ടപ്പന്‍ എന്നുപറയാതിരിക്കാന്‍ വയ്യ. അന്നെന്തോ, മെഡിക്കല്‍ കോളജിലെ ഡോ.കൃഷ്ണകുമാര്‍ വിസ്താരത്തിനെത്താതിരുന്നതിനാല്‍ കൂട്ടില്‍ അധികം നിന്ന് ഷൈന്‍ ചെയ്യാന്‍ പ്രതിക്ക് സാധിച്ചില്ല. പാവം...