കാലം കുറേയായി വക്കീല്‍ കുപ്പായമണിഞ്ഞിട്ട്. പേരെടുക്കാവുന്ന കേസുകളൊന്നും വക്കീലിന് ജയിച്ചുകയറാനായിട്ടില്ല. ഏതെങ്കിലും സര്‍വ്വീസിലായിരുന്നെങ്കില്‍ പെന്‍ഷന്‍ പാതിയും വാങ്ങി കഴിഞ്ഞേനെ. അത്രയായി വയസ്സ്. പേര് പറയുന്നില്ലെന്റെ പരമാ... ഇശ്വരന്‍ പോലും പൊറുക്കില്ല.
വക്കീലിന് അടുത്ത് ഒരു കേസ് ജയിക്കാനായി. ഒന്നര ലിറ്റര്‍ ചാരായവുമായി പിടിയിലായ ഒരാളെ വെറുതെ വിട്ട കേസ്. ഉത്തരവ് കടലാസിലാക്കി ആളുകളായ ആളുകളെയൊക്കെ കാണിച്ചു. കേസ് ജയിച്ചതിന്റെ വക ചായ വിളമ്പി. 'അബ്കാരി കോടതി' എന്ന് വക്കീലന്‍മാര്‍ വിളിക്കുന്ന ഒരു കോടതിയില്‍ വന്നുപോകുന്നവരോടൊക്കെ ആഘോഷത്തോടെ വിജയം അറിയിച്ചു.
അബ്കാരി കോടതിയില്‍ ചൂടേറിയ മറ്റൊരു കേസ് നടക്കുന്നതിനാല്‍ പ്രസ്തുത വക്കീലിന് വേറെ പണിയൊന്നുമില്ല. രാവിലെ വരും. കസേര പിടിച്ച് അതിലിരിക്കും. മൂത്രശങ്കമാറ്റാന്‍ എണ്ണീറ്റാല്‍പോലും സീറ്റുപോകുമെന്നതിനാല്‍ കുറ്റിയടിച്ചിരിപ്പുതന്നെ. അപ്പുറത്തും ഇപ്പുറത്തും ഇരിക്കുന്നവരെയും നില്‍ക്കുന്നവരെയും നോക്കി നന്നായി ചിരിക്കും. കോടതിക്ക് സമയംകിട്ടിയാല്‍ ചില അബ്കാരി കേസുകള്‍ തീര്‍പ്പിനായി എടുക്കും. അക്കൂട്ടത്തിലാണ് ഒന്നര ലിറ്റര്‍ ചാരായക്കേസിലെ പ്രതിയെ വെറുതെ വിട്ടത്. പ്രതിയെ വെറുതെ വിട്ടെങ്കിലും മുന്നില്‍ കാണന്നവരെയൊന്നും വക്കീല്‍ വെറുതെ വിട്ടില്ലെന്ന് സാരം.
No comments:
Post a Comment